कोल्हापुरात ‘आरोग्याची वारी, पंढरीच्या दारी’ उपक्रमांतर्गत आरोग्य दिंडी सोहळा उत्साहात
कोल्हापुरात ‘आरोग्याची वारी, पंढरीच्या दारी’ उपक्रमांतर्गत आरोग्य दिंडी सोहळा उत्साहात
—
आरोग्यमंत्री प्रकाश आबिटकर यांचेकडून कौतुक.
कोल्हापूर/ प्रतिनिधी
आरोग्य व कुटुंब कल्याण प्रशिक्षण केंद्र, शेंडा पार्क कोल्हापूर येथे ‘आरोग्याची वारी, पंढरीच्या दारी’ या उपक्रमांतर्गत भव्य आरोग्य दिंडी सोहळ्याचे आयोजन करण्यात आले
“जपुया वारसा संस्कृतीचा, घेऊया आनंद आरोग्य वारीचा” हा ध्यास घेऊन आयोजित आरोग्य दिंडी सोबत पारंपारिक वेशभूषेत आरोग्य कर्मचारी भक्तीरसात न्हावून निघाले. त्यानंतर भक्तिगीत गायनामध्ये ओव्या, भारुड,कीर्तन, वासुदेव, प्रवचन, गवळण आणि पथनाट्याच्या माध्यमातून आरोग्य संदेश देण्यात आले गीतेच्या माध्यमातून सार्वजनिक आरोग्य व कुटुंब कल्याण मंत्री तथा कोल्हापूर पालकमंत्री, प्रकाश आबिटकर यांच्या हस्ते विठ्ठलाच्या प्रतिमेचे पूजन करून सर्वांना चांगले आरोग्य मिळावे अशी प्रार्थना करण्यात आली. यावेळी आरोग्य सेवक, लिपिक सेवांतर्गत परीक्षा प्रमाणपत्र वितरण मंत्री अबीतकर यांच्या हस्ते पार पडला.
यावेळी बोलताना मंत्री आबिटकर म्हणाले, “प्रत्येक आरोग्य कर्मचाऱ्याने ही आरोग्याची वारी घरोघरी पोहोचवावी. वारीमध्ये आरोग्य विभागाचे काम खूप समाधानकारक असल्याबाबत सर्व कर्मचाऱ्यांचे कौतुक केले. त्यांनी भविष्यात सर्व प्रशिक्षण केंद्र अद्ययावत करण्याची गरज व्यक्त केली, तसेच अधिकारी व कर्मचारी यांच्या गरजा ओळखून, गरजेवर आधारित प्रशिक्षण देण्यावर भर देण्याची सूचना केली.
दिंडीमध्ये सहभागी झालेल्या कर्मचाऱ्यांनी वारीचा आनंद घेत डेंग्यू व टीबी यांसारख्या विषयांवर पथनाट्ये सादर केली. महिला अधिकारी व कर्मचाऱ्यांनी पारंपरिक संस्कृतीचा वारसा जपत आरोग्याच्या ओव्या गायल्या. झिम्मा, फुगडी, रिंगण सोहळ्यांमध्ये आरोग्य शिक्षण देणारे फलक झळकावत जनजागृती करण्यात आली.
प्राचार्य डॉ. योगेश साळे यांनी दिंडीमध्ये विविध अभंग रचनांचे गायन केले, ज्यामुळे जनसमुदाय भक्तीरसात तल्लीन झाला. कार्यक्रमाचे प्रास्ताविक करताना प्राचार्य. डॉ.योगेश साळे यांनी कार्यक्रमाची रूपरेषा विशद केली.
कार्यक्रमाचे नियोजन वैद्यकीय अधिकारी डॉ. विनायक भोई आणि आरोग्य शिक्षण विस्तार अधिकारी शकिला गोरवाडे यांनी केले. कार्यक्रमाच्या शेवटी खोत (पर्यवेक्षक) आणि देशमुख यांनी उपस्थितांचे आभार मानले.