भाविकांचे कारण दाखवून शक्तिपीठ प्रकल्प जनतेच्या माथी मारण्याचा प्रयत्न
भाविकांचे कारण दाखवून शक्तिपीठ प्रकल्प जनतेच्या माथी मारण्याचा प्रयत्न
– स्वाभिमानी शेतकरी संघटनेचे नेते राजू शेट्टी यांचा आरोप
-आजरा येथे शक्तीपीठ विरोधात बैठक
कोल्हापूर/ प्रतिनिधी
राज्य सरकारचा शक्तीपीठ महामार्ग करण्याचा हेतू हा भाविकांच्या सोयीपेक्षा अदानी उद्योग समुहाचे गौणखनिज गडचिरोली मधून थेट वास्को येथील त्यांच्या पोर्टवरून परदेशात निर्यात करायचे असल्यानेच भाविकांचे कारण दाखवून हा प्रकल्प जनतेच्या माथी मारला जात असल्याची टिका स्वाभिमानी शेतकरी संघटनेचे संस्थापक राजू शेट्टी यांनी शेळप ता. आजरा येथे झालेल्या शक्तीपीठ विरोधी बैठकीत केली.
शेळप ता. आजरा येथील ग्रामस्थांनी शक्तीपीठ महामार्गाविरोधात सुरू असलेल्या लढाईमध्ये एकजूट करत एक इंचही जमीन न देण्याचा निर्णय घेतला. शेळप गावाची याआधी सर्फनाला प्रकल्पासाठी ३५० एकर जमीन संपादित करण्यात आली आहे. सध्या गावातून शक्तीपीठ महामार्ग जाणार असून यामुळे मोठ्या प्रमाणात शेतकरी भुमिहीन होणार आहेत. अनेक कुटूंबातील तरूण भुमिहीन झाल्याने त्यांना पर्यायी जमीन नसल्याने शेती व्यवसायाचे नवीन संकट उभे राहत आहे.
यामुळे शेतक-यांनी शक्तीपीठ महामार्ग होवू न देण्याची ठाम भुमिका घेतली आहे. सध्या या गावाजवळून संकेश्वर ते बांदा हा राष्ट्रीय महामार्ग नुकताच पुर्ण झाला आहे. कोल्हापूर मधून गोव्याला जाण्यासाठी एकुण सात रस्ते असून त्यापैकी ४ राष्ट्रीय महामार्ग व ३ राज्य मार्ग सध्या अस्तित्वात आहेत.मग ८ वा शक्तीपीठ महामार्ग कशासाठी असा सवाल डोंगरी भागातील शेतकरी करू लागले आहेत.
सध्या अस्तित्वात असलेल्या रस्त्यांवरती अत्यंत तुरळक वाहतूक आहे. यामुळे राज्य सरकारचा शक्तीपीठ महामार्ग करण्याचा हेतू हा भाविकांच्या सोयीपेक्षा अदानी उद्योग समुहाचे गौणखनिज गडचिरोली मधून थेट वास्को येथील त्यांच्या पोर्टवरून परदेशात निर्यात करायचे आहे. या महामार्गावरून अदानीचे गौणखनिज जाणार व त्याचा भार राज्यातील सामान्य जनतेच्या व वाहनधारकांच्या टोलमधून पुढील ९० वर्षासाठी वसुल केला जाणार आहे. त्याबरोबरच या महामार्गातून ५० हजार कोटीचा ढपला पाडण्यासाठीचा खटाटोप असल्याने सर्व थरातून विरोध होत असतानाही राज्य सरकार रेटून नेण्याचा प्रयत्न करत असल्याची टिका शेट्टी यांनी केली.